Le beršestar 2005, e themutnengri asocijacija In Minorita kerel paš e tema, prekal savi pes leperel pro romano holokaust.

O projektos pes vičhinel Ma bisteren!, so slovaťika hina Nezabudnime! O projektoskro res hin te leperel o perzekuciji, save sas pro Roma andro berša, kana sas o dujto lumakro mariben. Sikavel pes, hoj but kampel te cirdel avri ola tematar so nekh buter, kana pes forminel o manušengro gindo a zumavel pes te phagerel o negativna stereotipi, prekal save pes phenel, hoj o historikane fakti hine chochade, bararel pes e rasovo intolerancija the pes sikavel e ksenofobija.
O autora pro konceptos hine e Zuzana Kumanová, PhD. the o PhDr. Arne Mann, CSc.

O projektoskre aktiviti učharen o buchlo spektrum, le rodipnastar prekal e publikačno aktivita, prezentačna the sikhavibnaskre aktiviti vaš o buter resoskre grupi the o medijalna aktiviti a sikhaviben avri la školatar.

Jekh kotor andro projektos hin, hoj pes sako berš, le beršestar 2005, kerel o leperibnaskro aktos paš o Leperibnaskro ďives pro romano holokaust (2. august), sakova andro Muzeum SNP andre Bansko Bystrica.

O leperibnaskre kidipena keras the andro Zvolen the Dubňica opral o Vahos.

Amara inicijativatar pen thode avri efta leperibnaskre bara the e informačno tabla.

Banská Bystrica – O pijetno kher andro Leperibnaskro than SNP. 
O leperibnaskro bar sikado avri 2. augustoste 2005.

 

Lutila
O leperibnaskro bar asikado avri 15. decembroste 2005.
O leperibnaskro bar kerďas o Ladislav Čisárik terneder the o Alexander Reind. 
Andal o gav andro decembros 1944 deportinde buter sar 40 lokalna Romen, saven paľis murdarde pre mulaňi bar andro Dolný Turček.

 

Nemecká
O leperibnaskro bar sikado avri 15. decembroste 2005.
O leperibnaskro bar kerde o akademicka sochara Jaroslava the Ján Šickova, e charťaňi buťi sas kerďi andre charťaňi ko Róbert Rigo andre Dunajsko Lužna. 
Andre vapenka andre Nemecko prekal o mariben bares murdarenas le manušen. Maškar o murdarde džene sas the o Roma.

 

Hanušovce nad Topľou
O leperibnaskro bar sikado avri 17. februariste 2006.
O leperibnaskro bar kerde o Ladislav Čisárik terneder the o Alexander Reindl. 
Andro berša 1941 – 1943 sas andro Hanušovce nad Topľou o than, kaj bešenas o vichodslovaťika buťakre kotora, kaj sas internovana nekh buter o romane murša.

 

Zvolen
O leperibnaskro bar sikado avri 8. apriľiste 2006.
E leperibnaskri tabla le murdarde manušengre lavenca sikaďi avri 10. decembroste 2015.
O leperibnaskro bar kerde o akademicka sochara Jaroslava the Ján Šickova, e charťaňi buťi sas kerďi andre charťaňi ko Róbert Rigo andre Dunajsko Lužna.
Pre židoviko mulaňi bar Zvolenoste sas andro masova hrobi parude the o murdarde džene andro represaliji, maškar lende the o Roma khatar o Podpoľaňije.

 

Slatina
O leperibnaskro bar sikado avri 22. decembroste 2006. 
O leperibnaskro bar kerďas o akademicko socharis Norbert Kelecsényi. E charťaňi buťi sas kerďi andre charťaňi ko Róbert Rigo andre Dunajsko Lužna.
Andro berš 1944 andro gav Slatina murdarde 60 Romen andal oda gav. O gav sas pre phuv, savi phirelas le ungriko maribnaskre themeske.

 

Dubnica nad Váhom
O leperibnaskro bar sas avri sikado 23. februariste 2007. 
E informačno tabla sikade avre 30. apriľiste 2017. 
O leperibnaskro bar kerďas o akademicko socharis Ján Šicko. O charťano bar the e informačno tabla kerďas o umelecko charťas Pavol Rác. 
Kana imar agorinelas o mariben, andre Dubnica nad Váhom kerde o phandľipnaskro taboris, kaj deportinde o romane fameľiji. Pal oda, so pes andro taboris ačhiľas e epidemija tifusis, 26 nasvale dženen brutalno murdarde.

 

Diňav avri buter zborňika the o lekhaviben khatar o Branislav Oláh.
Kerahas pro duj dokumentarna filmi the varesavemonotematicka relaciji andro narodnostna programi.
Phirďam pro deša lekciji the diskusiji pre savori Slovakija.

Amaro kotor buťi kerďam pro buter kheľibena e monodramakre Cikansko bokseris, savi lekhaďas e Rike Reinigerovo a khelďas o čechiko khelado Filip Teller.

Keras o džaňibnaskro rodipen a o nekh neveder prindžaripena pal kadi tema prezentinďam pro džaňibnaskre seminara andro berš 2006 the 2014.