O kvalifikovana štatistiki phenen, kaj andre Slovaťiko republika bešen ki o 400 000 Roma, so kerel ki o 7,45% andal o savore themutnengro gendo.

The te hine maškar o Roma pre Slovaťiko etnikane, socijalna the kulturna averipena, e majoritno populacija pre lende dikhel nekh buter sar pre jekh grupa. E čačikaňi vaj gondoľinďi aver kultura andre romaňi minorita the lakro kompletno dživipnaskro drom vazden maškar e majoritno populacija the o Roma o nakamiben. O aver themutne dikhen bilačhes pro Romengro averipen. Maškar e majoritno populacija hin nekh buter o gindo, hoj majbaro kotor le Romengro na kamel vaj na džanel sar te andre lel o khetaňibnaskre normi u o Roma daran u ačhen pre sera.

Baro bibuťariben maškar o baro kotor romaňi populacijakro, na dosta sikhľarde manuša u o zoralo than andro socijalno sistemos ačhaven o realna barijeri vaš e integracija. O problemi hin nekh buter ola romaňa populacija, kaj pen opre kiden buter bilačhipena. Majzorales perel o čoripen pro čhvore u terne manušen andal o marginalizovana thana, kaj lengre šajipena vaš e integracija nane bare. O segregovano sikhľuviben peravel tele o šajipena vaš teč a maškarutno sikhľuviben, u bi e škola the e šanca te arakhel o buťakro than hiňi cikňi. O bešiben andro bi lačhe thana pes dikhel the pro sasťipen: gindinel pes, hoj o Roma dživen deš berša charneder sar e majoritno populacija.